top of page

Hinonga Īnanga | Te Kura Kaupapa Māori o Te Rito

Tere ki uta, tere ki tai - whakaora īnanga whai mai!

“Me ngākau aroha te tamaiti ki tōnā ao, i mua i te ākī māna e whakarauora.”

Nei te Hinonga Īnanga kua waihape mai ki te mahitahi anō me Te Kura Kaupapa Māori o Te Rito i Ōtaki. I tēnei wāhanga, 25 ngā tauira nō Te Whānau Wehi me te Whānau Ihi (tau0-3) e rangahau ana i ngā momo īnanga me ngā koiora meroiti e noho kāinga ana i ngā awa o Ōtaki.


Kua ako ki te whiri ika mā te harakeke, kua tautuhi hātaretare, ā, kua puta ki ngā awa o Ōtaki, o Mangapōuri ki te āta hōmiromiro i ēnei uri e hoki whakaroto mai ana ki te taiao o Maru.


Wehi ana i te kitenga atu i a īnanga, i a pēpi-tuna, i ngā piriwai, ngarongaro wai nunui, ngaro waiwai kore anga, kapowai, me te maha o noke, o ngata mā. Ai auē! I kitea hoki he para e marara ana ki ngā tahataha.


Hei te wāhanga 4 ka aro ki ētahi kaupapa whakapiki i te mauri o ēnei awa pēnei i te kohi para. Ka tūhono hoki ki te rōpu Friends of the Ōtaki River ki te whakatō kākano ki te kōhanga ururākau kia rite pai ēnei tupu mō tērā tau te whakatō ki ngā awa.


Whai mai rā i ēnei ririki e ngākau aroha ana ki te ao me ōna tini uri, ōtirā e ngākaunui ana ki te whakarauora i ēnei taonga ā Maru, haere ake nei.


bottom of page