top of page

Te Noho Taiao ki Te Rarawa 2020 | Korou Kore Marae Ahipara

7 – 10 Hānuere 2020


He wānanga tēnei i karapinepinetia ngā tauira kura tuarua o Te Rarawa Kaiwhare ki Korou Kore Marae i Ahipara. Ko tōna wawata ko te whakaū i ngā hononga ā ngā tauira ki tō rātou kāinga me ōna hītoria kia kitea ai e rātou ngā marau pūtaiao hei huarahi anga whakamua, otirā, kia whai wheako e tūhonohono ai rātou ki taiao.

Ko ngā tuākana i tae mai hei taituarā, hei ringa tautoko ko Nikau Reti Beazley rātou ko Bella Waetford, ko Te Kuratai Painting, ko Reretai Hauiti, ko Wiremu Sarich, ko Sophia Thomas. Ko tētahi o ngā tino hua mōku he kite i te pakari me te whanake haere ā ngā tuākana e taetae mai ana ia tau, ia tau i runga i te kaingākau ki te kaupapa. Ko ā mātou mahi he hāpai i ngā whakaritenga mā te tuitui i ngā aho o te whanaungatanga i waenga i ngā rangatahi e noho tōpū ana ki ngā rōpu Atua. Ka arahina hoki rātou i roto

i ngā papamahi, ka tūhonohono hoki ma te whakatauira i ngā whanonga pai, ka mutu ka āwhinatia ngā kaiwhakahaere kia rere pai te wātaka.


Ko tētahi o ngā kaupapa i tuia ki te wātaka ko te ‘FIF Dune Lakes Community Education Day’ ki Waimimiha Roto. He kaupapa ka tautokona e Northland Regional Council, Enviroschools, otirā, tātou o Te Aho Tū Roa. Ko ngā papamahi i whakaritea mā te katoa he mātai wai, he ako tupu wai māori kei ngā roto tāhuna, he ako ika wai māori, me te ine i ngā tuna. Auē te nui o ētahi! Mā te toro ki ēnei tūmomo marau pūtaiao me te puta ā tinana ki te kite me te rongo i tāna pānga ki taiao arā ki ngā wāhi o te kāinga e whakaaweawe ai te ngākau rangatahi ki ēnei momo mahi ā tōna wā.

 

“Anō te āhuareka o te noho tahi ki a tātou tēina ki te ako, ki te whakawhitiwhiti kōrero mō ā rātou hiahia, wawata hoki mō āpōpō.” – Tuakana

 


Mā te noho ngātahi ā te teina me te tuakana i raro i te reo Māori me te whakaaro kotahi ka kite, ka rongo mai ngā teina i te mūrere o tō tātou ahurei Māori me ngā āhuatanga whakahaere o Te Aho Tū Roa. E kite ana i te whanake me te pakari haere o ngā ākonga e taetae mai ana ki ēnei mōmō wānanga ia tau, ia tau, ka mutu kua eke ētahi ki te tūranga tuākana i tēnei wā. Tomo atu ki konei ki te mātakitaki i te kiriata mō tēnei kaupapa rangatira - haramai tētahi āhua!

 

“Kei runga noa atu e hoa mā! Hīkaka katoa ana te manawa ki te hāpai i ngā mahi ā ngā rangatahi ki te whakapakari i a rātou, kia whai hononga hoki ki ngā atua o taiao.” – Tuakana


Whakaahua: Uenukuterangihoka Jefferies

bottom of page