Puta ki tai, puta ki taiao e!
Whāia i te hononga nei ki te mātakitaki i te kiriata hōu mo tēnei kaupapa - KIRIATA: TIHEI RIMURIMU!
I mōhio rānei koe he pia rimurimu i roto i te aihikirīmi? I mōhio hoki e taea ana te tupu ki te kotahi mita ia rā? Wawau ana ēnei meka! He taonga nui whakaharahara te rimurimu engari e matemate noa ana. Whai mai i a mātou e taki ana i tēnei kaupapa hou, e kawe atu ana i Te Kura Kaupapa Māori o Ngā Mokopuna ki ngā kārewatanga o ngā wai o Raukawa kia tūwhitia te hopo, kia puta ki tai, ki ngā ngahere moana o Te Whanganui ā Tara.
Kotahi tau te roa o te kaupapa rangahau, kia kite, kia rongo i te mana o rimurimu hei kāinga taurikura mā ngā tini uri moana; hei kai; hei rongoā; hei rawa rīwhi i te tākai kirihou; hei kaupare hoki i ngā tūkinotanga e pēhi nei i a Papatūānuku. Tihei Rimurimu!